शंकर मराठे - मुंबई, ६ जानेवारी २०२६ : मनोरंजन विश्वातून एक आश्चर्यकारक आणि धक्कादायक व्हिडीओ समोर आला आहे. 'नागिन', 'कहीं किसी रोज' यांसारख्या मालिका आणि अनेक चित्रपटांमधून त्यांनी आपल्या अभिनयाचा ठसा उमटविणारी प्रसिद्ध अभिनेत्री व नृत्यांगना सुधा चंद्रन यांचा एक व्हिडीओ सध्या सोशल मीडियावर प्रचंड व्हायरल होत आहे. देवीची आरती आणि भजन सुरू असताना अचानक त्यांच्या 'अंगात आल्याचा' प्रकार घडला आहे. या व्हिडीओमध्ये त्या देवीच्या भक्तीत इतक्या तल्लीन झाल्या की त्यांना सांभाळणे देखील कठीण झाले होते.
नेमकं काय घडलं? मिळालेल्या माहितीनुसार, सुधा चंद्रन यांनी आपल्या घरी 'माता की चौकी' आयोजित केली होती. यावेळी देवीची आरती व भजन सुरू होते. अचानक भजनाच्या तालावर नाचता-नाचता सुधा चंद्रन यांना भक्तीचा संचार झाला. त्या जोरजोरात घुमू लागल्या आणि त्यांचे हावभाव पूर्णपणे बदलले. यावेळी उपस्थित लोकांनी आणि त्यांच्या कुटुंबीयांनी त्यांना सावरण्याचा प्रयत्न केला, पण त्या कोणालाच जुमानत नव्हत्या. हा सर्व प्रकार कॅमेऱ्यात कैद झाला असून तो आता सोशल मीडियावर वाऱ्यासारखा पसरला आहे.
अभिनेत्री व नृत्यांगना सुधा चंद्रन यांच्या चाहत्यांनी त्यांची बाजू घेतली आहे. "ही त्यांची देवी प्रती असलेली श्रद्धा आहे, याला ड्रामा म्हणू नका," असे म्हणत अनेकजण त्यांच्या समर्थनासाठी पुढे आले आहेत. भक्तीत तल्लीन होणे ही वैयक्तिक बाब असल्याचे चाहत्यांचे म्हणणे आहे.
सुधा चंद्रन या हिंदी आणि मराठी मनोरंजन विश्वातील खूप मोठे नाव आहे. त्या स्वतः एक उत्तम नृत्यांगना आहेत आणि देवीच्या निस्सीम भक्त म्हणून ओळखल्या जातात. याआधीही त्यांनी अनेकदा सोशल मीडियावर आपल्या भक्तीचे व्हिडीओ शेअर केले आहेत, पण यावेळचा व्हिडीओ मात्र चर्चेचा विषय ठरला आहे.
No comments:
Post a Comment