सासू–सूनबाईची जुगलबंदी !

शंकर मराठे - मुंबई, १७ डिसेंबर २०२५ : ये “अगं अगं सूनबाई! काय म्हणताय सासूबाई?” या मराठी चित्रपटाचा टीझर प्रदर्शित होताच सोशल मीडियावर अक्षरशः धुमाकूळ उडाला आहे. कारणही तसंच—पहिल्यांदाच अभिनेत्री प्रार्थना बेहेरे व ज्येष्ठ अभिनेत्री निर्मिती सावंत एकत्र येत आहेत आणि सासू–सुनांच्या नात्याला एकदम नवं, खमंग आणि आधुनिक रूप दिला आहे.

टीझरमध्येच दोघींची जुगलबंदी पाहताना हे स्पष्ट होतं की, हा नेहमीचा टोमणे–तक्रारांनी भरलेला सासू–सून इक्वेशन अजिबात नाही. इथे दोन पिढ्या भिडतात… दोन विचारधारा टक्कर घेतात… पण शेवटी एकमेकींच्या आयुष्यात आधार बनत उभ्या राहतात. प्रार्थना आधुनिक, स्पष्टवक्ती आणि आत्मविश्वासू सून म्हणून चमकतेय; तर निर्मिती सावंत अनुभवसंपन्न, पारंपरिक, पण डोळ्यात प्रचंड माया असलेल्या सासूबाईंच्या भूमिकेत मन जिंकतात. या दोघींचे भावनिक क्षण, मिश्किल संवाद, आणि हलकीफुलकी चढाओढ—टीझरमध्येच प्रेक्षकांना हसवूनही जातात आणि थोडं डोळ्यात पाणीही आणतात.

१६ जानेवारीला प्रदर्शित होणारा हा सिनेमा आजच्या पिढीतील नातेसंबंध, स्त्री–स्त्री मैत्री आणि घरातील संबंध किती सुंदरपणे बदलू शकतात, हे दाखवणारा ठरणार आहे.