शंकर मराठे - मुंबई, ७ डिसेंबर २०२५ : ‘बाई अडलीये… म्हणूनच ती नडलीये’ — या एका ओळीनं महाराष्ट्राच्या अंगावर शहारे आणले, आणि आज त्याच ओळीच्या मागचं जग ‘आशा’च्या ट्रेलरमधून उघड झालं. रिंकू राजगुरू साकारत असलेली आशा — आरोग्यसेविका, मुलगी, पत्नी, योद्धा… आणि लाखो महिलांची प्रतिनिधी. गावोगावी सायकलवर फिरत, लोकांच्या जीवाचा भार वाहणारी ही आशा — अडथळे, अपमान, अन्याय आणि स्वतःचे दुःख घेऊन जगते. ट्रेलरमध्ये तिच्या न थांबणाऱ्या पावलांमागची जखम दिसते… आणि त्यात प्रेरणा दडलेली आहे.
या ट्रेलरचं सर्वात ताकदीचं क्षण म्हणजे — “चालत रहा पुढे” हे गाणं. रिंकूच्या डोळ्यांत वेदना, आवाजात निर्धार आणि चेहऱ्यावर थकवा असूनही हार न मानणारी उर्मी दिसते. ट्रेलर लाँचला आशा सेविकाच्याच उपस्थितीने या सिनेमाचा आत्मा अधिक प्रामाणिक झाला — कारण ही केवळ कथा नाही, ही त्यांची जिद्द आहे.
१९ डिसेंबरला प्रदर्शित होणारा ‘आशा’ सिनेमा — एक कथानक नाही, तर प्रश्न आहे: इतकं सगळं देणाऱ्या नायिकांसाठी समाजात जागा कुठे आहे? ट्रेलरनं हा प्रश्न घराघरात पोहोचवायला सुरुवात केली आहे.
No comments:
Post a Comment