शंकर मराठे - मुंबई, १० जानेवारी २०२६ : संपूर्ण महाराष्ट्राचे लक्ष लागून राहिलेल्या 'बिग बॉस मराठी'च्या साहव्या पर्वाचा बिगुल वाजला आहे. येत्या ११ जानेवारी २०२६ पासून हा शो सुरू होत असतानाच, कलर्स मराठीने पहिल्या स्पर्धकाचा एक धमाकेदार प्रोमो सोशल मीडियावर शेअर केला आहे. या प्रोमोमुळे प्रेक्षकांमध्ये प्रचंड उत्सुकता निर्माण झाली असून "फॅशनच्या जगातील ही सुंदरी" नेमकी कोण, यावरून सोशल मीडियावर चर्चेला उधाण आले आहे.
कलर्स मराठीने अधिकृत इन्स्टाग्राम हँडलवर एक एआय जनरेटेड प्रोमो शेअर केला आहे. या प्रोमोमध्ये एक ग्लॅमरस महिला साडी नेसून दरवाजापाशी उभी असल्याचे दिसत आहे. या व्हिडिओला "फॅशनच्या जगातील ही सुंदरी, भल्याभल्यांवर पडणार भारी!" असे कॅप्शन देण्यात आले आहे. या एका वाक्यामुळे ही स्पर्धक फॅशन किंवा लाइफस्टाइल क्षेत्राशी संबंधित असल्याचे स्पष्ट होत आहे.
प्रोमोमध्ये स्पर्धकाचा चेहरा स्पष्ट दिसत नसला तरी, तिच्या देहबोलीवरून आणि कॅप्शनवरून चाहत्यांनी तर्क लावायला सुरुवात केली आहे. कमेंट सेक्शनमध्ये दोन नावे प्रामुख्याने चर्चेत आहेत: एक नाव आहे उर्मिला निंबाळकर तर दूसरे नाव सोनाली राऊत. मात्र, अधिकृत नाव अद्याप गुलदस्त्यात आहे. आता ही 'फॅशन क्वीन' खरोखर कोण आहे, हे पाहणे औत्सुक्याचे ठरेल.
यंदाचे पर्व देखील रितेश देशमुख होस्ट करणार आहेत. 'बिग बॉस'च्या नवीन घराचा प्रोमो आणि आता स्पर्धकांचे प्रोमो पाहता, यंदाचा सीझन अधिक भव्य आणि ग्लॅमरस असणार असल्याचे दिसून येत आहे. येत्या रविवारी, ११ जानेवारीला रात्री ८ वाजता होणाऱ्या ग्रँड प्रीमियरमध्ये या सर्व गुपितांवरून पडदा उठणार आहे.
No comments:
Post a Comment