संजय दत्तचा 'डेडली' लूक सिनेमा 'राजा शिवाजी'

शंकर मराठे - मुंबई, १३ डिसेंबर २०२५ :  मराठी चित्रपटसृष्टीतील सर्वात भव्य ऐतिहासिक चित्रपट मानल्या जाणाऱ्या आणि रितेश देशमुखच्या दिग्दर्शनाखाली तयार होत असलेल्या 'राजा शिवाजी' सिनेमाची सध्या जोरदार चर्चा आहे. या चित्रपटातील एक मोठी अपडेट समोर आली असून, बॉलीवूडचा 'खलनायक' संजय दत्त याचा अफजलखानाच्या भूमिकेतील पहिला लूक लीक झाला आहे. सोशल नेटवर्किंग साइटवर व्हायरल झालेल्या या व्हिडिओमुळे चाहत्यांची उत्सुकता शिगेला पोहोचली आहे.

सेटवरून लीक झालेल्या एका व्हिडिओमध्ये संजय दत्त अफजलखानाच्या गेटअपमध्ये दिसत आहे. त्याचे वाढलेले केस, दाढी आणि डोळ्यांतील क्रूरता यामुळे त्याचा लूक अत्यंत 'डेडली' आणि प्रभावी वाटत आहे. ऐतिहासिक संदर्भाला साजेसा पेहराव आणि संजय दत्तची देहबोली पाहून हा चित्रपट मोठ्या पडद्यावर इतिहास घडवणार, अशी चर्चा आता सिनेवर्तुळात रंगली आहे. संजय दत्तने यापूर्वी 'अग्निपथ'मधील कांचा चीना आणि 'केजीएफ 2' मधील अधिरा यांसारख्या भूमिकांतून नकारात्मक पात्रांना एक वेगळी उंची दिली आहे. 

रितेश देशमुख स्वतः या चित्रपटाचे दिग्दर्शन करत असून तो छत्रपती शिवाजी महाराजांची मध्यवर्ती भूमिका साकारणार आहे. या चित्रपटाची निर्मिती रितेशची पत्नी जेनेलिया देशमुख आणि जिओ स्टुडिओच्या ज्योती देशपांडे करत आहेत. चित्रपटात केवळ मराठीच नव्हे तर बॉलीवूडमधील अनेक दिग्गज कलाकार आहेत.

या भव्य चित्रपटाला महाराष्ट्राचे लाडके संगीतकार अजय-अतुल यांचे संगीत लाभले आहे, तर छायाचित्रणाची जबाबदारी प्रसिद्ध सिनेमॅटोग्राफर संतोष सिवन सांभाळत आहेत. हा चित्रपट मराठी, हिंदी, तमिळ, तेलुगू, कन्नड आणि मल्याळम या ६ भाषांमध्ये प्रदर्शित होणार असून, १ मे २०२६ रोजी तो प्रेक्षकांच्या भेटीला येईल.