जुही चावला यशस्वी 'बिझनेस वुमन'

शंकर मराठे - मुंबई, ११ फेब्रुवारी २०२६  : बॉलिवूडमध्ये साधारणपणे असं मानलं जातं की, जोपर्यंत तुमचे चित्रपट बॉक्स ऑफिसवर चालतात, तोपर्यंतच तुमची कमाई आणि स्टारडम टिकून राहतं. एखादी अभिनेत्री पडद्यापासून लांब गेली की तिची चर्चा आणि कमाई दोन्ही कमी होते. मात्र, ९० च्या दशकातील लोकप्रिय अभिनेत्री जुही चावला याला पूर्णपणे अपवाद ठरली आहे. श गेल्या १३ वर्षांत एकही मोठा हिट सिनेमा दिलेला नाही. तरीही आज ती देशातील सर्वात श्रीमंत अभिनेत्रींच्या यादीत अव्वल स्थानावर आहे. जुही चावलाने १९८६ मध्ये 'सल्तनत' चित्रपटातून आपल्या करिअरची सुरुवात केली, पण तिला खरी ओळख १९८८ मध्ये आलेल्या 'कयामत से कयामत तक' या ब्लॉकबस्टर सिनेमाने मिळवून दिली. आमिर खानसोबतची तिची जोडी खूप गाजली आणि ती रातोरात स्टार झाली. त्यानंतर तिने १०० हून अधिक हिंदी, तमिळ आणि इतर भाषिक चित्रपटांत काम केले. कालांतराने तिने मुख्य भूमिकांऐवजी छोट्या किंवा पाहुण्या कलाकाराच्या भूमिका स्वीकारायला सुरुवात केली. मागील १३ वर्षांत तिच्या नावावर एकही सोलो हिट चित्रपट नाही, तरीही तिची आर्थिक प्रगती मात्र थक्क करणारी आहे. जुही चावलाची एकूण संपत्ती तब्बल ४६०० कोटी रुपयांच्या घरात आहे. 
त्याचबरोबर शाहरुख खानसोबत 'कोलकाता नाईट रायडर्स' या आयपीएल टीमची मालकी जूहीने स्वीकारली. रिपोर्ट्सनुसार, या टीमचे व्हॅल्यूएशन आज ९००० कोटींहून अधिक आहे आणि त्यात जुहीचा मोठा वाटा आहे. याशिवाय ती शाहरुखच्या 'रेड चिलीज एंटरटेनमेंट' आणि 'सौराष्ट्र सिमेंट' या कंपन्यांमध्येही भागीदार आहे. अभिनयापेक्षा व्यवसायातील या 'ब्लॉकबस्टर' कामगिरीमुळेच जुही चावला आज एक यशस्वी 'बिझनेस वुमन' म्हणून ओळखली जाते.
तात्पर्य हेच आहे की कलाकाराने केवळ अभिनयावर अवलंबून न राहता योग्य ठिकाणी गुंतवणूक केली, तर तो किती मोठे साम्राज्य उभे करू शकतो, याचे जुही चावला हे एक उत्तम उदाहरण आहे.